Grande acollida da carpa informativa do Revitaliza en Cambados

Máis de 50 familias están en lista de agarda para recibir un composteiro individual no que tratar os seus biorresiduos

A Deputación de Pontevedra iniciou unha nova campaña sobre compostaxe coa instalación en diferentes concellos dunha carpa informativa na que dar a coñecer o Plan Revitaliza e a animar á veciñanza a compostar ben cun composteiro individual no caso de familias con casas con horta ou ben en centros de compostaxe comunitaria nas zonas máis urbanas. No día de hoxe o destino da carpa foi o Concello de Cambados, onde as mestras e mestres composteiros provinciais tiveron unha grande acollida e receptividade por parte da cidadanía.

A carpa montouse aproveitando o habitual mercado, próxima aos postos de venda, e foron moitos os cambadeses e cambadesas as que se achegaron para recibir información e consultar as súas dúbidas. O goteo de interesados e interesadas foi continuo e repartíronse mostras de compost, plantas, guías de compostaxe e material divulgativo para facilitar a compostaxe.

No posto informativo as mestras e mestres composteiros deron explicacións sobre os composteiros individuais para ter no fogar, e tamén sobre como funcionan os centros de compostaxe comunitaria (CCC), xa que nestes momentos o concello dispón de dous en funcionamento e hai previsión para instalar outros catro máis repartidos en diferentes zonas da vila.

O interese pola compostaxe no Concello de Cambados tense activado ultimamente, xa que se está a avanzar na repartición de composteiros individuais. Están xa esgotados os facilitados pola Deputación de Pontevedra e a día de hoxe, incluíndo as solicitudes recollidas na carpa, hai unha lista de agarda que pasa do medio cento de familias.

As actividades de información sobre o Plan Revitaliza pretenden xerar unha dinámica de dinamización e impulso da compostaxe como un modelo de xestión do lixo ambientalmente sustentable, achegando de maneira lúdica e sinxela á veciñanza que é compostar: dar unha nova vida aos residuos orgánicos para que volvan de novo á terra como fertilizante natural e xeren novos produtos, fomentando así a economía circular en lugar de queimalos ou envialos a un vertedoiro.