Os centros de compostaxe comunitaria do Morrazo produciron máis de 85 toneladas de compost dende a súa posta en marcha
O persoal técnico do Plan Revitaliza da Deputación xestionou e controlou a compostaxe dunhas 250 toneladas de biorresiduos
Os centros de compostaxe comunitaria do Plan Revitaliza da Deputación instalados no Morrazo teñen xestionado máis de 252 toneladas de biorresiduos e producido máis de 85 toneladas de compost sen cribar dende a súa posta en marcha. Este dato foi facilitado hoxe na charla sobre compostaxe realizada polas mestras e mestres composteiros provinciais, que estiveron en Cangas nas Xornadas Etnográficas do Morrazo dando a coñecer as vantaxes da compostaxe como modelo de xestión do lixo, ambientalmente sustentable e máis económico que o actual.
Segundo explicou o persoal técnico, nestes momentos están activos nove composteiros comunitarios na comarca. Dous deles están instalados no Concello de Bueu, nas Lagoas (dende outubro de 2016) e na rúa Xosé María Estévez (dende abril de 2017), onde se trataron arredor de 72 toneladas de biorresiduos, é dicir, de lixo orgánico da veciñanza da zona (restos de comidas e vexetais) e de fracción vexetal (restos de podas e estruturante).
Estes residuos foron tratados in situ baixo a vixilancia das mestras e mestras composteiras ata que se converteron en compost e, polo tanto, detraéronse dos colectores verdes e non tiveron que ser enviados a Sogama. O resultado foi a produción de aproximadamente unhas 25 toneladas de compost groso, das que unha parte deixáronse en bruto para fertilizar xardíns e fincas e outra pasou pola peneira para obter compost máis fino para ser utilizado en macetas pequenas.
Por outra banda, no Concello de Cangas a veciñanza ten a disposición os centros de compostaxe comunitaria da avenida de Galicia, xardín de Andrea, e da avenida de Ourense, todos eles instalados en outubro de 2016. Estes composteiros levan tratadas máis de 116 toneladas de biorresiduos e producidas arredor de 39 toneladas de compost, que tamén se repartiron entre a veciñanza e os servizos municipais para o coidado dos xardíns públicos.
No Concello de Moaña, finalmente, existen outros catro centros de compostaxe comunitaria. Os máis antigos están na praza 25 de xullo e na avenida Concepción Arenal e foron instalados xullo de 2016 e abril de 2017 respectivamente, cunha grande participación social e incluso unha horta urbana posta en marcha de forma paralela. Esta boa acollida levou ao Concello a aumentar o número de composteiros, instalando un de grandes dimensións na rúa Daniel Castelao (de dez módulos) no mes de febreiro deste ano, e outro no CEIP Reibón no mes de abril. En total, o persoal técnico da Deputación leva xestionado alí unhas 65 toneladas de biorresiduos que supuxeron a produción dunhas 22 toneladas de compost sen cribar.
Con estes datos sobre a mesa, a mestra e o mestre composteiro da Deputación responsables da charla fixeron ver as claras vantaxes do modelo Revitaliza baseado no tratamento en proximidade dos residuos orgánicos mediante a compostaxe. Insistiron en que ademais de converter os restos da comida e vexetais nun recurso para producir o compost e fertilizar a terra co seu beneficio ambiental, hai tamén unha vantaxe económica para as arcas municipais, xa que non é preciso recoller o lixo orgánico (afórrase o custo do camión), non hai que trasladalo a Sogama (afórrase o transporte), e non hai que queimalo (afórrase o custe da incineración).
Destacaron, así mesmo, que se en lugar de nove centros de compostaxe comunitarios na comarca, o modelo estivese extendido de maneira global atendendo ás zonas densas mediante centros comunitarios e ás zonas máis diseminadas con composteiros individuais para as casas con horta, os beneficios ambientais (produción de compost e eliminación de emisións de CO2) e o aforro serían exponenciais.
As mestras tamén destacaron que a calidade do compost que se produce nos centros de compostaxe comunitaria de toda a provincia é moi alta, tendo a maior cualificación dentro dos parámetros esixidos pola Unión Europea. Subliñaron que periódicamente se realizan analíticas e que os datos se cargan nunha exclusiva aplicación móbil de maneira telemática para que a Deputación centralice os datos de todos os centros de compostaxe, seguindo o seu funcionamento e garantindo a trazabilidade dos lotes de compost producidos.